24.終覺其反 (第1/6页)

    

24.終覺其反

    亞熱帶初春趟度雨水三候，旭陽追照幽暗罅隙，反轉紅港枯榮。

    嶙峋樓宇擎架港空碧落，玻璃幕窗煥映石屎森林壯麗奇觀，擠迫地表盡納眼底。

    勝基中心92年竣工招商，與毗鄰致富同為皇后大道置業新貴，設施配備仍處商貿前沿，兩年後正值樓市遏價週期跌頓，前租主清算撤資，龍睿初返故土果斷接手筍盤，敲槌蓋印租下18樓整層。

    福地沃野，鞋金低廉，俯瞰孖寶樓裙房，勝基雖犯火凶角煞，卻有蘇杭街隔離刃面，又得祝安行一排矮屋壓底衝散。眺望信德雙子，東北艮方八運正神，汲取維港金池貫震、兌二宮穿堂而來，財水雨露均霑。

    公司名鴻升，鴻圖大展，升發條達，红港菁英着西服耍洋腔，骨子裡篤信風水衰旺，返工搵銀講究個吉應意頭。

    薄荷香氛中和幽淡霉味，百葉帘將偷漏光線切成幾何細條，斜列在粒塵不染的長桌一側，採光優良，無需點亮格柵白熾燈爭輝，有利開源節流。

    十點十五分，灰紋日內瓦地氈降減腳步噪聲，拖椅背，擱物什，翻文件，部門監事幾乎各就各位，會議室今年首次人氣濃重。

    售務課Nathan匆忙趕至，聳肩歪頸夾住電話，捏紙快速檢閱資料有否遺漏，還伸腿替身後提壺拎杯的阿羽撐擋室門，一心多用，像極華爾街日理萬機的投行大家。

    阿羽輕輕頷首致謝Nathan，他不自覺拉高天生豪嗓，同僚趨往注目，習以為常埋頭。

    「有冇搞錯，日日低開低走，呢個禮拜call咗三次孖展！」，來到預留位，Nathan空出右手握電繼續指斥：「係你話佢代號靚槓桿高，保證快入快出，等咗成個半月都無啖好食。」

    「如果唔係你家姐，我真係懷疑你同經紀行朋友過水濕腳夾埋嚟呃份佣，下次有料唔該唔好搵我做老襯！」

    掛斷前嘀咕句粉腸怨嗟，恆指略有回落，好歹破13000大關，憑什麼一片蒼翠如茵中他要死揸血淋淋的異股？

    對面Hugo身體前傾，恤衫隨隆凸腰腹起褶，朝他干笑道：「又補倉？一串綜企跌到螺洲門，早就叫你揸地產揀紅籌啦。」

    不忿似證線刺激反彈，舌抵前顎，訕訕回敬落井石塊：「你條友隨口噏當秘笈，炒樓花就吹地產，新鴻基幾時將你大頭印喺D傳單度做形象大使？」

    「講事實你不嬲buy唔落，如今High   Tech揩嘢，Low   Tech撈嘢，仲量行數據唔睇？跟住升浪嘅只有地產。」

    「地王全造住宅樓？邊個唔知滙豐恆生唔批超過半年嘅樓花按揭，你長揸嗰隻02036擺明借殼上市，個升幅仲衰過街邊砵仔糕。」

    「點都好過揸垃圾化工做咸魚，永遠翻唔到身。」

    「睬你都傻。」，Nathan駁辭卡殼，Hugo先下一城。

    職場鬥法調劑沉闷，精彩不輸倫理劇婆媳互撼。

    申報課女助理指揉太陽xue，杏眼45度瞄空，慢條斯理續接戰局：「人哋Nathan話晒係top   sales嚟，有能力賺花紅買Chaumet氹老婆，唔似某D咸魚，扮闊佬飛歐羅巴嘆世界，成家跟住佢屈埋隻腳坐經濟艙最後一排。」

    「仲有啊，過時過節帶兩梳蕉上外父屋企，十足老慳喔。」鄰座Louise五指開合，表情誇張戲嘲。

    「乜你咁啢?，呢D叫物輕情意重~」

    矛頭折轉，省去指名道姓，零稀笑聲遮嘴掩不住。

    鴻升公關課葛朗台，家有賢良端莊妻，一雙吞金化骨龍，遊走在4664嬰兒潮高低不就的狹縫，普通，平庸，囊空如洗也要實現有瓦遮頭。咬牙鑽營炒樓花大軍，蒼蠅逐奔樓盤生蛋，終究掘到金桶，從貧瘠的樂富邨遷往康澤花園700平方呎單位。

    四捨五入，貼近半山。

    漸漸磨成中生代，嫌你有，笑你無，榨兑優越，仇上妒下，集七姑八嬸的刻薄市儈，刮一股漒水尖酸味，嗆得他人脾肺鼓燎泡。

    「喫，你哋呢啲X世代單身寡佬，